Oppmøte er kl. 20:00 på Gjendesheim Turisthytte.

Vi møtast på kvelden før turstart, og har etter dette 5 turdagar saman.

Vi stiller ikkje spesifikke krav til tidlegare erfaring for denne turen, men du bør ha gått eindel på ski før. Du må og vera klar over, og førebudd på at det er lange dager ute på tur, noko som er greit å veta at ein handterer. Når det er sagt så går vi aldri raskt og har god tid desse dagane, som gjer at vi kan nyte det å vera undervegs på tur.

Førebu deg gjerne ved å gå nokre fjellskiturar med litt vekt i sekken, så aukar du sjansa for meir komfort og overskot undervegs på turen.

Dag 0 - oppmøte på Gjendesheim Vi møtast på Gjendesheim til middag og har ferdråd denne kvelden. Dette så gruppa blir kjend med kvarandre, vi får snakka gjennom turen, forventningar og planlegge fyrste turdag.

Dag 1 - Gjendesheim til Glitterheim Fyrste etappe er den desidert tøffaste på heile ruta, med 26 km og over 1000 høgdemeter. Denne dagen går vi gjennom klassisk høgfjellsterreng i Jotunheimen, fyrst opp til Russvatnet og vidare over Vestre Hestlægerhøe. Frå her ventar 400høgdemeter med nedkjøring til Glitterheim. På Glitterheim ventar oss eit hyggjeleg vertskap og servering av nydeleg middag.

Dag 2 - Glitterheim til Spiterstulen Denne dagen startar litt rolegare langs stikkaløypa innover Veodalen. Vi er omkransa av dei mektige Veotindane, Ryggjehøe og Leirhøe. Etter omlag 7km tek vi noko meir høgdemeter opp mot Skautflye, der vi får eit meir lettgått terreng og viddelandskap. Dersom forholda tillet det så går vi via brefronten på Veobrean for å nyte synet av blåisen. Dagens etappe avsluttast med 400høgdemeter nedkjøring mot Spiterstulen, i tidvis bratt terreng. Her legg vi rutevalet etter kva som gjev den beste oppleving på fjellski. Vi går totalt 17km denne dagen, og kan sjå fram til dusj, god mat og hyggje framfor peisen.

Dag 3 - Spiterstulen til Leirvassbu Etter to litt harde etapper ventar det ein kortare og litt rolegare dag, med 14,5km. Denne dagen følgjer vi Visdalen innover mot Leirvassbu, omkransa av 2000-meters toppar i alle himmelretningar heile dagen. Denne dagen går i lett terreng, men slak stigning delar av dagen. Siste del mot Leirvassbu har vi moglegheit til å hente litt høgde for å nyte litt fjellskikjøring om gruppa ynskjer og forholda ligg til rette. Leirvassbu ligg omtrent midt i Jotunheimen, og her skal vi nyte utsikt til fantastiske fjell både frå spisesalen og peisestova.

Dag 4 - Leirvassbu til Gjendebu I dag går turen søraustover mot Gjende og Gjendebu. Vi kryssar Leirvatnet med utsikt mot majestetiske Kyrkja, og skal over passet ved Høgvaglen. Vi går totalt 19km denne dagen, men frå Høgvaglen går det slakt nedover i enkelt og fint skiterreng. Vi går langs Langvatnet og slepp oss ut den vakre Storådalen. Gjendebu ligg fantastisk til og vil by på ei storslått overnatting med god mat.

Dag 5 - Gjendebu til Gjendesheim Siste dag skal vi tilbringe langs ikoniske Gjende. Vi går løypa over vatnet, og vil ha god tid til å nyte dei vakre omgjevnadane. Fyrst passerar vi Bukkelægret, og langs siste del vil vi gå innunder Besseggen og Besshøe. Vi går 21km denne dagen, men flat og enkel trasè. Siste dag er den enklaste, men med sliten kropp og mange opplevingar i baggasjen - så blir dette ein fin dag til å kunne tenkje gjennom og reflektere over dei fantastiske opplevingane undervegs. Framme ved Gjendesheim oppsummerar og avsluttar vi turen på ein god måte i gruppa. Nokre ynskjer kanskje ein roleg kveld med treretters middag og ei god seng for natta, medan andre ynskjer å reise heimatt.

Vi skal inn i eit høgfjellsområde der været kan skifte fort, men vil normalt sett kunne handtere desse etappane om det blir dårleg vær. Været er ein del av opplevinga, men om det set ein stoppar for planlagt gjennomføring, så har vi alltid gode alternativ i bakhand for å kunne tilby gruppa eit fullverdig opplegg. Vi tilbyr ikkje avbestillingsforsikring, så om du blir nødt til å avlyse turen er det di eiga reiseforsikring som dekkjer dette. Set deg inn i våre vilkår her.